正忙於為九月七日演唱會進行密集式排練的古巨基，明天將推出年度唱片《Moments》，由於今次主題是擴大到世界人與人之間相遇的微妙時刻，唱片公司落足本讓基仔去到日本、倫敦、巴黎、威尼斯、維也納及北京等地方，拍攝唱片封套及MV。最後一站基仔就選擇了在北京天安門廣場取景，他表示：「今次要到北京係因為呢個地點好代表到自己的國家，而天安門升旗禮更加係每個中國人必須親身感受一下，雖然我已經第三次睇，但仲係好感動。」

當日基仔要在天光前到達天安門廣場，所以在凌晨四點出發，當時已經有過千人在睇升旗禮，為怕引起混亂，於是基仔被大班工作人員圍住免得被人發現，但最後都給人發覺，結果引來幾百名市民追住基仔，不停影相簽名，其中有一名女歌迷在影合照時更飛擒大咬，問都沒有問就一口啜落基仔塊面，誰知在他還未來得及反應之際，另一名女歌迷又有樣學樣，再係基仔塊面錫多一啖，在短短一分鐘內基仔被兩度強吻。基仔說：「當時真係有啲突然，仲要兩人輪流，但係見到佢哋咁熱情都好開心。」

除了在天安門廣場拍攝外，基仔亦有到當地著名的體育學院拍攝小朋友訓練的情況。只有六、七歲小孩表現堅毅，令基仔好感動。小朋友不停大叫古巨基，有咬字不清的小朋友叫他古基基，引得他非常開心，離開時大家亦好唔捨得。25日基仔將會在銅鑼灣時代廣場舉行首個個人相展，展示他今次在世界各地拍攝的作品。